完美 — 分心的來源 | Perfection is a Distraction

完美聽落係一件好事，但係其實又未必係一個最好既心態。係做每一件事既時候，我地係心入面當然想做到最完美，程現到最完美既一面比其他人睇啦，但係有時候追求完美就正正成為左令我地分心既原因。

當我地集中精神係追求完美既時候，我地會想等一個最好既時機，等自己買曬專業既器材，或者等自己做好研究，就會去真正行動，但係依個時候我地會愈諗愈多步驟，覺得總會差少少野先可以開始個行動。

加上係心態上面會驚自己做唔出一個完美既作品，或者驚自己做出黎既野會比人批評，所以最後就好容易將依一件事放埋一邊，令到我地將件事一拖再拖。

例如我地有時候覺得只要有左部高級既相機，再上一啲攝影班，學埋點用lightroom，或者要有一個攝影既friend一齊影，之後就可以去行動影得出一張靚相。

或者係開一個YouTube channel既時候，會諗想要有一個好好既相機，高質素既咪，好好既燈光，講野好流暢先可以出第一條片，依啲原因就我係出第一條片既時候都面對過困難，令到我自己拖左一斷時間先夠膽upload條片，好好彩咁岩係個陣唔記得左係邊一度認識到依一句 "Perfection is a distraction"令到我印象好深刻，所以即使我個陣係知道我講野好唔流利，畫面同埋內容都唔吸引，我最後都接受左依一條片upload上youtube。

係進步既過程一定會有唔完美既地方，所以當我地要去開始一樣野既時候，放棄少少完美既心態而直接去行動，係行動既過程入面攞到一個feedback番黎，我地就可以再慢慢一步一步令個一件事更加完美。

---

如想看我在YouTube中分享有關「完美」相關的內容，可以按此