簡單的三步，令你不再衝動消費

我地係街上面好容易就會見到新版籃球鞋，新iPhone, 新相機，當你未發現佢既時候都冇咩野，但係當你見過個一樣野一次之後，就會每一日都諗住佢，好想買佢番屋企。就好似我之前同人補習賺番黎既錢，唔知點解好似成日都冇曬，因為當自己有錢既時候又會想衝動去買下野。我就想分享一下我依家會用到既三個技巧去避免依一啲衝動既消費。

首先第一，就係改變角度，我地平時睇一個產品既時候，通常都係會睇佢個價錢，同埋自己既銀行account，例如一部iPhone $8000，我當自己銀行account有$50000，咁睇落又唔似好大筆錢呀，可以買呀。我地可以轉一轉個角度去睇依個iPhone，依$8000，到底我地要番幾耐工先可以買得起呢？假設我有時薪$60，依一部iPhone就已經值，8000/60，即係我既人生133個鐘，我當每一日番8個鐘，依一部iPhone就已經值我番17日既工，換句話黎講，即係如果我唔買依一部新既iPhone，我間接送左17日既假期比自己，可以做少17日野，慢慢就會打消左去買既念頭啦。

第二，就係當我地一見到一樣好想買既野，依家唔好買住，番屋企思考下人生先，如果過兩日都重係覺得係一定要買既，先去買，因為係我地衝動既時候係好容易會做錯一個決定，而係要理性咁分析一下係唔係真係咁需要依一樣野。

所以就去第三點，就係分清楚想要vs需要，有好多野其實都係我地想要，但係又未必需要既，我依家手上面就用緊iPhone XS Max，我自己最主要既用途都係上下網，睇下youtube, ig依一啲野，如果問我想唔想要iPhone 12? 咁當然想要啦，有一部新機又型又快啲，影相又靚啲，又有新設計，緊係好架。但係如果問我需唔需要呢? 咁就未必啦，我平時都只不過係上下網姐，快都對我冇咩分別，所以事實上我都唔係需要iPhone 12，但係如果你部iPhone 12 係好重要既，可能係工作上用到佢個新鏡頭呀，要快啲呀，咁就可能會變左需要啦。

所以最主要係三點，一，將價錢轉為我地要付出既時間，二，就係等兩日再買，三，分清楚想要vs需要。